Diwrnod Arddangos Arloesedd mewn Adeiladu Rheilffyrdd ar Safle Canolfan Fyd-eang Rhagoriaeth Rheilffyrdd

Bydd y Ganolfan Fyd-eang ar gyfer Rhagoriaeth Rheilffyrdd yn cynnal ei hail ddiwrnod arddangos diwydiant ar safle GCRE yn Ne Cymru fis nesaf.

Ddydd Iau 20fed Mawrth, bydd y Ganolfan Fyd-eang ar gyfer Rhagoriaeth Rheilffyrdd yn cynnal Diwrnod Arddangos Arloesedd mewn Adeiladu Rheilffyrdd mewn partneriaeth ag Innovate UK. Bydd y digwyddiad diwrnod cyfan yn cael ei gynnal ar safle GCRE yn Ne Cymru.

Bydd y digwyddiad yn arddangos deuddeg prosiect arloesol sydd wedi dod drwy'r Rhaglen Arloesedd mewn Adeiladu Rheilffyrdd gwerth £7.4m.

Mae’r rhaglen yn cael ei hariannu gan Adran Busnes a Masnach Llywodraeth y DU a’i threfnu gan Innovate UK. Mae GCRE yn cynnal y gystadleuaeth ar seilwaith a ddatblygwyd ar safle GCRE.

Bydd y diwrnod yn cynnwys y cyfle i weld technoleg a ddatblygwyd drwy'r rhaglen a gosodiadau byw.

Dywedodd Rob Forde, Cyfarwyddwr Strategaeth, Sgiliau a Gweithrediadau GCRE Ltd:

“Yn ystod y diwrnod arddangos bydd rhanddeiliaid o’r diwydiant a chysylltiadau allweddol o bob rhan o Ewrop yn bresennol i weld y prosiectau rydym yn eu cynnal ac i ddeall potensial gwirioneddol ryngwladol y Ganolfan Fyd-eang dros Ragoriaeth mewn Rheilffyrdd fel safle ar gyfer ymchwil, profi ac arddangos rheilffyrdd a symudedd o’r radd flaenaf.

“Mae’r Ganolfan Fyd-eang ar gyfer Rhagoriaeth Rheilffyrdd yn gyfleuster newydd, pwrpasol sy’n cael ei adeiladu yn Ne Cymru sydd â’r potensial i ddod yn brif ganolfan Ewrop ar gyfer arloesi ym maes rheilffyrdd a symudedd cynaliadwy, gan ddarparu ystod o wasanaethau sy’n unigryw ar draws y cyfandir. Rydyn ni’n edrych ymlaen at ddefnyddio’r diwrnod i ddangos beth sy’n bosib yn GCRE.”

Dywedodd Pennaeth Arloesedd GCRE Ltd, Kelvin Davies:

“Mae wedi bod yn wych gweld y syniadau’n cael eu datblygu drwy’r rhaglen Arloesi mewn Adeiladu Rheilffyrdd a gwylio prosiectau’n dod yn fyw ar y safle. Bydd y diwrnod arddangos y byddwn yn ei gynnal ym mis Mawrth yn helpu i amlygu’r gwaith pwysig hwnnw ar gyfer cynulleidfa ehangach.

“Mae gennym ni nifer cyfyngedig o leoedd ar gael i bobl fynychu’r diwrnod a byddem yn annog pobl i gofrestru lle.”

Gwahoddir y rhai sydd â diddordeb mewn mynychu'r diwrnod i gofrestru lle trwy'r ddolen isod.

Manylion: Diwrnod Arddangos Arloesedd mewn Adeiladu Rheilffyrdd

Dyddiad: Dydd Iau 20 ^Mawrth 2025

Amser: 9.00yb – 4.00yp

Lleoliad: Canolfan Fyd-eang Rhagoriaeth Rheilffyrdd, Nant Helen, Powys, SA10 9PD

Dolen i Gofrestru ar gyfer Digwyddiad: https://www.eventbrite.com/e/gcre-innovation-in-railway-construction-demonstration-day-tickets-1178135578229?aff=oddtdtcreator