GCRE a Phrifysgol Abertawe yn cytuno ar bartneriaeth ymchwil 'unigryw'

Mae’r Ganolfan Ragoriaeth Fyd-eang ar gyfer Rheilffyrdd (GCRE) a Phrifysgol Abertawe wedi cytuno ar gydweithrediad ymchwil newydd pwysig wedi’i leoli yng nghyfleuster arloesedd GCRE o’r radd flaenaf sy’n cael ei adeiladu yn Ne Cymru. 

Bydd y Ganolfan Ragoriaeth Fyd-eang ar gyfer Rheilffyrdd yn safle ar gyfer gwaith ymchwil, profi ac arddangos cerbydau rheilffyrdd, seilwaith a thechnolegau newydd arloesol o safon ryngwladol. 

Bydd y memorandwm cyd-ddealltwriaeth a lofnodwyd rhwng y ddau gorff yn galluogi Prifysgol Abertawe a GCRE i gydweithio ar feysydd o ddiddordeb ymchwil cyffredin. 

Mae Prifysgol Abertawe eisoes yn adnabyddus ym maes arloesedd rheilffyrdd, gan ei bod yn aelod cyswllt o Rwydwaith Ymchwil ac Arloesedd Rheilffyrdd y Deyrnas Unedig (UKRRIN) ac yn meddu ar brofiad sylweddol mewn meysydd gan gynnwys signalau rheilffyrdd, seilwaith a pheirianneg sifil. 

Yn ogystal ag arloesedd rheilffyrdd, mae safle 700 o hectarau GCRE yn darparu cyfleoedd sylweddol i gefnogi astudiaethau mewn meysydd ymchwil cydategol fel ynni adnewyddadwy, gwyddorau naturiol ac ystod eang o ddisgyblaethau peirianneg. Mae’r bartneriaeth yn caniatáu i’r safle gael ei ddefnyddio gan academyddion o bob rhan o’r Brifysgol. 

Ar wahân i’r memorandwm cyd-ddealltwriaeth hwn, bydd Prifysgol Abertawe hefyd yn bartner mewn Canolfan Ragoriaeth newydd ar gyfer Profi, Dilysu a Phrofiad Cwsmeriaid yn GCRE, ochr yn ochr â Phrifysgol Birmingham a Phrifysgol Caerdydd, yn dilyn dyfarniad o £15m gan Gronfa Buddsoddi Partneriaeth Ymchwil y Deyrnas Unedig (UKRPIF).

Dywedodd Pennaeth Strategaeth a Sgiliau’r Ganolfan Ragoriaeth Fyd-eang ar gyfer Rheilffyrdd, Rob Forde: 

“Mae’n wych cytuno ar y bartneriaeth ymchwil unigryw hon rhwng y Ganolfan Ragoriaeth Fyd-eang ar gyfer Rheilffyrdd a Phrifysgol Abertawe. 

“Mae gan Abertawe rai cryfderau sy’n arwain y sector mewn meysydd allweddol gan gynnwys technoleg, peirianneg a seilwaith rheilffyrdd, a bydd GCRE yn darparu llwyfan i alluogi ei thimau i ymgymryd ag ymchwil a datblygu arloesol, yn ogystal â darparu lleoliad gwych i fyfyrwyr ennill sgiliau a phrofiad mewn amgylchedd rheilffordd byw. 

“Mae’r bartneriaeth yn un naturiol iawn mewn sawl ffordd. Mae’r brifysgol wedi’i lleoli’n agos iawn i’r safle ac mae’n bwysig i ni yn GCRE ein bod yn manteisio ar y cryfder a’r gallu sydd ar ein trothwy. Bydd y cleientiaid y byddwn yn gweithio gyda nhw ac yn hwyluso profion iddynt ar y safle yn sicr yn gwerthfawrogi’r ffaith fod prifysgol mor adnabyddus ag Abertawe yn gysylltiedig â’r cyfleuster.

“Rydyn ni’n gyffrous iawn am y bartneriaeth y byddwn yn ei datblygu gyda’n gilydd, yn enwedig i gefnogi cydweithrediadau ymchwil y tu allan i faes rheilffyrdd. Mae ein safle’n fawr iawn, yr un maint â Gibraltar, ac mae’r ffaith ei fod yn cynnwys tirwedd mor ddiddorol ym mhen uchaf cymoedd Dulais a Thawe yn golygu y gall gynnal ystod eang o gyfleoedd ymchwil mewn meysydd fel ynni a’r gwyddorau naturiol. 

“Rydyn ni’n edrych ymlaen yn fawr at ddatblygu’r bartneriaeth ymchwil unigryw hon â thîm dawnus Abertawe.” 

Dywedodd yr Athro David Smith, Dirprwy Is-ganghellor a Deon Gweithredol, y Gyfadran Gwyddoniaeth a Pheirianneg, Prifysgol Abertawe:

“Rydyn ni’n falch iawn o gryfhau ein perthynas bresennol â GCRE a chreu partneriaeth fwy ffurfiol rhwng ein sefydliadau. Bydd ein cydweithrediad yn cynnwys datblygu sgiliau, hyfforddi myfyrwyr ac arloesedd mewn Gefeillio Digidol, Ynni a Sero Net, Deunyddiau a Seilwaith, a Gwyddor Amgylcheddol ar yr un pryd â chefnogi technoleg ac arloesedd rheilffyrdd rhanbarthol a chenedlaethol. 

“Mae GCRE yn gyfleuster unigryw yn y Deyrnas Unedig ac, yn wir, yn Ewrop, ac rydyn ni’n ffodus iawn ei fod ar ein trothwy. Edrychwn ymlaen at weithio gyda’r tîm yn GCRE i ddatblygu cyfleoedd ar gyfer ymchwil ac addysg ddylanwadol trwy’r bartneriaeth newydd hon.”